ହାଥରସ: ଉତ୍ତରପ୍ରଦେଶରୁ ଦୁଃଖଦ ଖବର ଆସିଛି । ସତସଙ୍ଗରେ ପ୍ରବଚନ ଶୁଣିବାକୁ ଯାଇଥିବା ଲୋକମାନେ ଫେରିବା ବେଳେ ଦଳାଚକଟା ହୋଇ ଅନେକ ଲୋକଙ୍କ ପ୍ରାଣ ହରାଇଛନ୍ତି । ଉତ୍ତରପ୍ରଦେଶର ହାଥରସ ଜିଲ୍ଲାର ସିକନ୍ଦରାଉ କୋଟୱାଲୀ ଅଞ୍ଚଳର ରତିଭାନପୁରରେ ସତସଙ୍ଗ ଶେଷ ହେବା ପରେ 50 ଜଣଙ୍କର ମୃତ୍ୟୁ ଘଟିଛି। ଅନେକ ଲୋକ ଗୁରୁତର ଆହତ ହୋଇ ଚିକିତ୍ସିତ ହେଉଛନ୍ତି । ମୃତ୍ୟୁ ସଂଖ୍ୟା ବଢ଼ିବାର ସଂଭାବନା ରହିଛି । ସାକାର ବିଶ୍ୱ ହରି ଭୋଲେ ବାବାଙ୍କ ସତସଙ୍ଗ ଚାଲିଥିଲା ବେଳେ ଏଭଳି ଭୟଙ୍କର ଘଟଣା ଘଟିଛି । ମହିଳା ଓ ଶିଶୁଙ୍କ ଅଧିକ ଜୀବନ ଯାଇଛି ।
ଏହି ଦୁର୍ଘଟଣା ସମ୍ପର୍କରେ ମୁଖ୍ୟମନ୍ତ୍ରୀ ଯୋଗୀ ଆଦିତ୍ୟନାଥ ମୃତକଙ୍କ ଶୋକସନ୍ତପ୍ତ ପରିବାରବର୍ଗଙ୍କୁ ଗଭୀର ସମବେଦନା ଜଣାଇଛନ୍ତି। ଆହତମାନଙ୍କୁ ତୁରନ୍ତ ଡାକ୍ତରଖାନାକୁ ନେଇ ସେମାନଙ୍କୁ ଉପଯୁକ୍ତ ଚିକିତ୍ସା ଯୋଗାଇଦେବାକୁ ସେ ଜିଲ୍ଲା ପ୍ରଶାସନ ଅଧିକାରୀଙ୍କୁ ନିର୍ଦ୍ଦେଶ ଦେଇଛନ୍ତି। ଆହତମାନଙ୍କ ଶୀଘ୍ର ଆରୋଗ୍ୟ କାମନା କରିଛନ୍ତି।
